Redjan Rraja, nipi i deputetit socialist, Rrahman Rraja, është arrestuar nga policia.
Ai dyshohet se ka marrë pjesë në atentatin ndaj prokurorit të Durrësit, Arjan Ndoja.
Rraja me profesion stomatolog, nuk është një emër i panjohur për policinë.
I riu ka rënë në pranga edhe më parë, më 3 maj të 2016-ës.
Asokohe ai u akuzuar se fshehu provat për zbardhjen e vrasjes së Elton Çiços, në një lokal në zonën e ish-bllokut në Tiranë.
Rraja u dënua me 8 muaj burg, pasi fshehu pistoletën në vendin e krimit.
Gjithashtu Rraja përmendet edhe në dosjen e ‘Xhisiela Malokut’, e cila nisi pas denoncimit të ish-oficerit të policisë, Emiljano Nuhu.
Xhisiela në dëshminë e saj në Prokurori, thoshte se Ramazan Rraja, Rexhep Rraja dhe Redjan Rraja, e kanë dhunuar për shkak se kishte bërë kallëzimin.
“Rreth orës 20:00 ka ardhur tek banesa ime në fshatin Nikël, shtetasi Rexhep Rraja, Ramazan Rraja dhe shtetasi Redjan Rraja, dhe më kanë marre me zorrë duke më thënë na hape punë për çfarë ke shkruar përsëri në komisariatin e Policisë Nr.3 në Tiranë, dhe na ke kallëzuar , unë i mohova dhe i thash që nuk kam qenë në polici, Rexhepi më kapi nga flokët dhe më gjuajti me shkelma dhe më futi në makinën e tij, dhe më thoshte që do e tërheqësh denoncimin ose do të të vrasim me vendosi në barkë pistoletën, e mbushi dhe më tha që sot nuk ke shpëtim se na ke hapur shumë punë k*rvë e m*tit”, deklaroi Xhisiela në prokurori.
Më pas në disa intervista për mediat, ajo mohoi versionin që kishte rrëfyer deri në ato momente.
