Situara në fshatrat buzë Vjosës do të përkeqësohet deri në mesditë nga prurjet e mëdha të ujërave. Kreu i Njësisë Administrative Novoselë, Kanan Shakaj flet mbi situatën me reshjet e shiut në zonën në fjalë dhe rrezikun që kanoset nëse lumi Vjosë del nga shtrati.
Sipas tij, 15 familje janë në shtrat të lumit, ndërsa shtoi se janë lajmëruar blegtorët që të heqin bagëtitë.
“Vjosa ka filluar që ditën e djeshme rritjen e nivelit. Nga dje deri sot është shtuar 4.5 metra. Vazhdon rritja. Nga sa kemi informacion në Memaliaj nivelet janë të vogla, mendojmë që nuk do të ketë prurje në nivele të larta. Zakonisht Vjosa del nga shtrati i saj, jemi këtu te pazari dhe pritet të vazhdojë deri nga ora 2 me ujërat që vijnë nga lart.
Por nuk e dimë si do të vazhdojnë ditën e sotme. Mendoj që 5-6 orë do të jetë në këto nivele.
Kemi 15 familje që janë në shtrat të lumit. I kemi njoftuar blegtorët që të heqin bagëtitë. Po vazhduan reshje të fuqishme me këto prurje që ka Vjosa edhe mund të dalë. Po varet nga reshjet në Përmet dhe Gjirokastër.
Tani niveli është 6.6, rrezikohet me nivelin 7.3, pra niveli 7 duhet të lajmërohen njerëzit“, është shprehur kreu i Njësisë Administrative Novoselë, Kanan Shakaj. /Gazetareforma.com/
