Iker Casillas, portieri kampion i botës me Spanjën në 2010, i rritur tek Real Madrid dhe portier i Blancos nga 1999 në 2015, tani në sezonin e tij të katërt tek Porto, është goditur nga infarkti i miokardit gjatë stërvitjes së paradites. I shtruar me urgjencë në spitalin e Oporto, Casillas është operuar menjëherë dhe është jashtë rrezikut për jetën: “Ndihem mirë – ka komunikuar portieri vetë – gjithcka është në kontroll. Vetëm një frikë e madhe. Faleminderit të gjithëve për mbështetjen që treguat”.
Porto kishte menduar të qetësonte tifozët, shokët e skuadrës dhe kolegët, që shpejtuan të tregojnë ndjeshmërinë e tyre me spanjollin, duke bërë një komunikatë për shtyp për gjendjen e Casillas, që në 20 maj do të mbushë 38 vjec:
“Iker – shkruan komunikata e klubit – ka pësuar një infarkt të miokardit gjatë stërvitjes. Seanca u ndërpre për ti dhënë ndihmën e duhur portierit, që ndodhet në spitalin CUF të Oporto. Është mirë dhe gjendja e tij është stabël. Problemi kardiak është zgjidhur.”
Gjithashtu, edhe ish-klubi i tij, Real Madrid, ka postuar një deklaratë për portierin: “Real Madrid dëshiron të transmetojë të gjithë mbështetjen për kapitenin e dashur Casillas.”
Lajmi për atakun kardiak ndaj tij, bëri xhiron e botës, ndërsa të shumtë ishin njerëz nga bota e futbollit, klube të ndryshme, por edhe tifozë të shumtë, iu bashkuan lutjeve për shërim të shpejtë të Iker Casillas.
