Dita e sotme ka shënuar fazën e tretë në lehtësimin e masave në Francë, sipas një njoftimi në fund të muajit prilli nga presidenti i vendit, Emmanuel Macron. Franca ka rihapur restorantet, kafenetë dhe muzetë, në një kapacitet prej 1 mijë deri në 5 mijë persona.
Gjithashtu, Franca ka ri-hapur kufijtë për personat që duan të vizitojnë vendin. Më tej, Franca ka vendosur edhe një sistem të ngjashëm me Anglinë, me vende të klasifikuara si jeshile dhe të kuqe, në varësi të situatës së tyre epidemiologjike. Vendet e gjelbërta përfshijnë pjesën tjetër të BE-së, si Australia, Izraeli, Japonia, Libani, Zelanda e Re, Singapori dhe Korea e Jugut.
Turistët ose duhet të jenë vaksinuar plotësisht me një vaksinë të aprovuar nga Agjencia Evropiane e Barnave, që janë: Pfizer, BioNTech, AstraZeneca, Universiteti i Oksfordit, Moderna dhe Johnson&Johnson, ose të tregojnë një test negativ PCR jo më shumë se 72 orë para udhëtimit, nëse nuk preferojnë të vaksinohen.
Franca është një nga vendet më të prekura në Europë, me më shumë se 110 mijë viktima, që nga fillimi i pandemisë. Mesatarisht, 6 mijë persona kanë rezultuar pozitive çdo ditë gjatë javës së kaluar.
Numri i shtrimeve në spital, gjithashtu ka pësuar rënie dramatike gjatë dy muajve të fundit, me 394 pacientë me COVID-19 të shtruar ditën e djeshme. Më shumë se 28 milionë persona kanë marrë të paktën një dozë të një vaksine anti-Covid, ndërsa më shumë se 14 milionë janë vaksinuar plotësisht.
