Një çift izraelit është vendosur në telashe në Turqi, pasi kanë fotografuar rezidencën e presidentit turk, Rexhep Taip Erdogan. Ata janë duke u akuzuar për spiunazh, shkruajnë mediat lokale turke.
Burime bëjnë me dije se çifti e ka fotografuar rezidencën presidenciale nga lokali ku ndodheshin, e që kishte pamje të plotë të godinës.
Nga ana tjetër, Ministri i Jashtëm i Izraelit, Jair Lapid, mohoi që çifti po punonte për ‘shërbimet izraelite’ të sigurisë, duke shtuar se janë në kontakt të vazhdueshëm me autoritetet turke për çiftin e arrestuar.
Gazeta izraelite “Haaretz” identifikoi çiftin si Natalie dhe Mordi Oknin dhe duke iu referuar avokatit të tyre mësohet se ata kanë fotografuar nga lokali pallatin Dolmabahçe të ndërtuar në kohën e Perandorisë Osmane.
Presidenti turk, jeton në një godinë me 1100 dhoma, pishina, tualete, dhoma me avull turke, copa mëndafshi, kopshte zbukuruese dhe të ndriçuara gjatë natës që arrin të shihet nga 4.5 mln banorë të Turqisë. Fotot e publikuara nga rezidenca”Erdogan”, kalojnë çdo lloj parashikimi të mundshëm.
Çdo gjë brenda saj është mobiluar nga shijet e vetë presidentit, me dysheme mermeri, pajisje ari, qilima të kuq. Kjo rezidencë është 30 herë më e madhe se Shtëpia e Bardhë. Super ndërtesa ku jeton Erdogan me familjen, mendohet të jetë ndërtesa më e madhe e ndërtuar në 100 vitet e fundit.
