Skena në kufijtë e sureales janë fotografuar nga reporterët e mediave greke dhe atyre të huaja në zonat e goditura nga cikloni “Ianos”.
Imazhet që tregojnë skena gati apokaliptike vijnë nga Assos, në ishullin Kefalonia të Greqisë. Një masiv i tërë me gurë dhe baltë ka mbuluar makinat në rrugë, si pasojë e vërshimit të përrenjve.
Pamjet tronditëse, siç shkruajnë mediat greke, vijnë si pasojë e motit të keq, me erëra të forta e shi të rrëmbyeshëm, ndikuar nga cikloni “Ianos” që goditi ishujt e detit Jon.
Siç shihet edhe në foto, janë me dhjetëra makinat e groposura poshtë gurëve dhe baltës.
Dy persona kanë vdekur dhe një person është raportuar i zhdukur deri tani, raporton BBC.
Kryeministri grek, Kyriakos Mitsotakis, ka dërguar disa zyrtarë qeveritarë në zonat më të goditura në këtë rajon.
Pamjet në rrjete sociale kanë shfaqur stuhi të mëdha në ishujt e Kefalonia dhe Zakynthos të premten. Të gjitha fluturimet dhe transportet tokësore janë anuluar dhe turistët janë këshilluar të qëndrojnë brenda.
Ekipet e shpëtimit raportohet se janë duke vazhduar kërkimet për viktima të tjera të mundshme.
/GazetaReforma.com/
