Forcat rebele në Siri kanë marrë kontrollin e pjesës më të madhe të qytetit Aleppo, i cili është qyteti i dytë më i madh në vend, sipas grupit monitorues me bazë në Mbretërinë e Bashkuar, Observatori Sirian për të Drejtat e Njeriut (SOHR).
SOHR raportoi se më shumë se 300 persona, përfshirë mbi 20 civilë, janë vrarë që nga nisja e ofensivës ditën e mërkurë.
Kjo është ofensiva më e madhe kundër qeverisë siriane në vitet e fundit dhe hera e parë që rebelët arrijnë të hyjnë në Aleppo që nga tërheqja e tyre pas ndërhyrjes së ushtrisë në vitin 2016.
Sipas burimeve ushtarake, aeroporti i Aleppos dhe të gjitha rrugët hyrëse në qytet janë mbyllur.
Rebelët, arritën të pushtonin pjesën më të madhe të qytetit pa hasur rezistencë të madhe, raportoi SOHR të shtunën në mëngjes.
Ndërkohë, forcat qeveritare njoftuan të premten se kishin rimarrë disa pozicione në provincat Aleppo dhe Idlib, pas kundërsulmit të tyre ndaj ofensivës së nisur nga rebelët.
Që nga fillimi i luftës civile në Siri, pasi qeveria shtypi protestat pro-demokratike në vitin 2011, më shumë se 500 mijë persona janë vrarë.
Rebelët, përfshirë grupe xhihadiste, përfituan nga trazirat për të marrë kontrollin e disa territoreve.
Qeveria siriane – me ndihmën e Rusisë dhe aleatëve të tjerë – më vonë rimori shumicën e zonave që kishte humbur.
