Ish-kryeministri , Sali Berisha ka zhvilluar ditën e sotme takimin e radhës me demokratët e qytetit të Beratit. Në foltoren që zhvilloi në Berat, Berisha ka sulmuar sërish kryeministrin Edi Rama, por këtë herë në lidhje me satelitët që ai ka përmendur shpesh në daljet publike të diëve të fundit.
Ish-kryeministri ka thënë se Rama po huton shqiptarët me satelitët “Arnaut 1” dhe “Arnaut 2”, ndërkohë që shqiptarët janë të fundit në rajon për rrogën mesatare.
“Janë rritur çmimet e ushqimeve bazë. Çdo qeveri e përgjegjshme do të indeksonte rritjen e çmimit, nuk ka shtuar asnjë qindarkë në rrogat dhe pensionet tuaja. Pra, kafshata u shtrenjtua edhe më shumë e shqiptarët nuk marrin një qindarkë kompensim. Sepse kreu i Meduzës don t’i hutojë ata me ‘Arnaut 1’ ‘Arnaut 2’, me satelitë 1 me satelitë 2. Sepse problemi i shqiptarëve qenka sateliti dhe u thotë fermerëve do t’i keni të dhënat me satelit. Një mashtrues dhe i pashpirte! Nëqoftëse shqiptarët 8 vite më parë qëndronin në krye të popujve të rajonit për rrogën mesatare, përfshirë edhe bullgarë e rumunë, sot janë të fundit dhe marrin 30% më pak se në Kosovë, në Shqipëri. Miliarda euro janë marrë borxh. Deklaruan se do të dalin në treg për të marrë 700 mln euro borxh, kur thonë se ekonomia u rrit me 18%, mashtrojnë. Me këtë rritje të borxhit, çfarë është ndërtuar në këto 8 vite? Vetëm 34 km autostradë, janë ndërtuar disa dhjetëra km rrugë të tjera jo autostradë, absolutisht që të gjitha janë shpërdoruar. Sot 1 km rrugë e ndërtuar me paratë tuaja kushton 8-11 herë më shumë se ato që ndërtohen nga Komisioni Europian apo Bankave Evropian. Tenderat i përfiton baxhanaku i Edi Ramës, i cili duhej të përjashtohej nga tenderat”, tha Berisha.
Më tej ish-kryeministri Sali Berisha ka thënë se në 5 vitet e fundit janë larguar nga vendi ynë 520 mijë shqiptarë.
“Në 5 vitet e fundit janë larguar nga Shqipëria 520 mijë qytetarë. Po ndodh një spastrim i heshtur i qytetarëve sepse Edi Rama arreston në një vit 38 mijë qytetarë për fatura energjie dhe uji. Që nuk i arreston kush në botë për çështje civile. Edi shpërndau vetëm gjatë muajit prill 91 milionë euro në zonat e tërmetit për të blerë vota. Përdori bandat dhe kartelet e drogës. Kreu i opozitës në vend të dilte në shesh në mbrojtje të votës suaj, u kthye dhe po merret me karrigen e tij. Duhet të bënim të paktën atë që bëmë në 2001 të vendosnim sanksione”, shtoi ish-kryeministri.
