Emisioni italian “Chi l’ha visto?” ka zbuluar se çiftit shqiptar Shpëtim dhe Teuta Pasho, që u vranë në provincën e Firences, i mungonin 40 mijë euro që i kishin pasur me vete. Ky është një detaj të rëndësishëm, që mund të jetë edhe motivi i vrasjes. Mbrëmjen e djeshme në emision u bë me dije fakti se pas vrasjes, çiftit shqiptar i mungonte kjo shumë parash.
Këto euro i kishte përfituar Shpëtim Pasho si dëmshpërblim për një aksident që kishte pësuar në Shqipëri.
Një tjetër pistë ku po hetojnë autoritetet është ajo e hakmarrjes për pazaret e drogës. Ndërsa vajza e vogël e familjes ka thënë se kjo pistë ka pak gjasa të lidhet me vëllain e saj, që kishte pak kohë që ishte liruar nga burgu për çështje të drogës. Ajo tha se vëllai ishte një shpërndarës i vogël narkotikësh.
Për emisionin italian, vajza e çiftit rrëfeu edhe telefonatën e mistershme që kishte marrë natën e zhdukjes së prindërve. Një numër privat i telefonoi, ndërsa zëri i një gruaje që ngjante me zërin e nënës së saj i tha “unë po iki, ju shihni punët tuaja”.
Të zhdukur në vitin 2015, trupat e masakruar u gjetën të ndarë në katër valixhe që ishin hedhur në periferi të Firences.
/Gazetareforma.com/
