Mbrëmjen e sotme, një lajm shumë i mirë gëzoi të gjithë shqiptarët, pasi kryeministri Rama bëri me dije se pacienti i parë është drejt shërimit.
Ai ka rezultuar negativ në testin e parë dhe nëse pas 48 orësh rezulton sërish negativ, atëherë ai do jetë personi i parë i shëruar në vendin tonë.
Lajm i mirë! Pacienti i parë me COVID-19 në vendin tonë është drejt shërimit
Pas kësaj, emisioni “Open” kontaktoi me një nga pacientët që po kurohet nga COVID-19 në Spitalin e Infektivit, i cili ka folur rreth historisë së tij.
Pacienti është shprehur se në fillim ka qenë shumë i tmerruar, por shtoi se nuk ka asgjë për tu shqetësuar, pasi sipas tij ky virus është më pak se një grip normal.
“Kam bërë tamponin dhe në datën 10 kam dalë pozitiv, pasi kisha kontakte me mikun tim që është babi i pacientit “0”. U tremba, sepse ishte një sëmundje e padëgjuar, shumë panik, shumë problem, po flitej në të gjithë botën. Një tmerr i vërtetë. Unë në momentin që kam dalë pozitiv, kam qëndruar gjatë gjithë kohës në shtëpi.”
I pyetur rreth simptomave që ka shfaqur ai u shpreh se ka patur vetëm djersë e më pas temepraturë, por tregoi se ka komunikuar me mjekët dhe e ka përballuar situatën me paracetamol dhe ushqime të shëndetshme.
Sipas tij, është e rëndësishme që në këto raste të ruhet qetësia, pasi paniku dëmton edhe më shumë teksa theksoi se situata mund të menaxhohet edhe në shtëpi, pa patur nevojë të shkosh në spital.
“Ditët e para kisha vetëm djersë, pastaj kisha temperaturë dhe më pas kisha vështirësi me frymëmarrjen. Jam ndihmuar nga mjekët me anë të telefonit, por nuk kam marrë antibiotik dhe jam ushqyer si ditët e tjera. Kam pirë lëngje dhe ushqime të tjerë. Është çështje paniku më shumë, nuk është një gjë e pamenaxhueshme, është më pak se një grip normal”, u shpreh pacienti i identifikuar nga moderatorja si Mark.
42-vjeçari u shpreh se tashmë është në një gjendje të mirë dhe se pret të shërohet shumë shpejt.
Në rang botëror deri tani janë shënuar 7,531 viktima dhe janë regjistruar mbi 194 ,000 të infektuar në 163 shtete, ndërsa në vendin tonë deri tani ka humbur jetën 1 person dhe janë infektuar 55 të tjerë, teksa në Kosovë janë 19 persona të infektuar me COVID-19.
Autoritetet shëndetësore bëjnë thirrje që personat të cilët mund të kenë qenë të ekspozuar ndaj individëve të dyshuar për COVID-19, duhet që të vetëkarantinohen dhe të monitorojnë shëndetin e tyre për 14 ditë, që nga dita e fundit me kontaktin e mundshëm.
Po ashtu, ata duhet të kërkojnë mbikëqyrje të menjëhershme mjekësore, nëse paraqesin ndonjë nga simptomat, veçanërisht temperaturë, simptoma respiratore si kollë dhe vështirësi në frymëmarrje apo diarre menjëherë të kontaktojnë 127.
Të gjithë qytetarët rekomandohet që të shmangin daljet në publik dhe të qëndrojnë në shtëpi duke respektuar rregullat e higjenës.
