Një tjetër sinjal i qartë se qëndrimet evropiane ndaj Rusisë po ashpërsohen vjen nga Finlanda.
Ministria e Mbrojtjes në Helsinki ka njoftuar se do të furnizojë Ukrainën me municione në vlerë prej 90 milionë eurosh, duke përdorur të ardhurat që burojnë nga asetet ruse të ngrira.
Sipas agjencisë Reuters, në total rreth 210 miliardë euro nga 300 miliardë dollarë në asete ruse të bllokuara ndodhen brenda territorit të BE-së, kryesisht në formën e obligacioneve shtetërore të mbajtura nga Banka Qendrore e Rusisë.
Komisioni Evropian kishte vendosur më herët që të ardhurat nga këto asete të përdoren për të financuar ndihmën ushtarake ndaj Ukrainës, përmes një fondi të veçantë të menaxhuar nga BE.
“Ne arritëm të sigurojmë fonde shtesë për të forcuar mbështetjen tonë ndaj Ukrainës,” deklaroi ministri finlandez i Mbrojtjes, Antti Hakkanen.
Nga ana tjetër, Kremlini nuk ka reaguar ende për këtë hap të fundit, por ka përsëritur më herët se çdo veprim për të përdorur asetet e ngrira ruse do të përbënte shkelje të të drejtave të pronësisë, do të ishte i paligjshëm dhe se Rusia do të ndiqte rrugën gjyqësore për të kundërshtuar një veprim të tillë, duke e cilësuar si precedent të rrezikshëm.
