FIFA ka ndëshkuar Federatën Shqiptare të Futbollit për sjellje diskriminuese nga tifozët shqiptarë gjatë ndeshjes ndaj Andorrës, e luajtur më 24 mars 2025 në “Arenën Kombëtare”, e vlefshme për kualifikueset e Botërorit 2026.
Komisioni Disiplinor i FIFA-s e ka cilësuar të papranueshme sjelljen e tifozëve dhe ka vendosur një gjobë prej 20 mijë frangash zvicerane ndaj FSHF-së. Krahas gjobës, është urdhëruar edhe mbyllja e të paktën 20% të kapacitetit të stadiumit në ndeshjen e radhës që Shqipëria do të zhvillojë në një kompeticion të organizuar nga FIFA. Pjesët që do të mbyllen do të përfshijnë kryesisht tribunat pas portave.
FIFA ka parashikuar që kjo hapësirë të mund të shfrytëzohet nga grupe të komunitetit apo organizata kundër diskriminimit, por vetëm pas miratimit zyrtar nga institucioni i futbollit botëror. Ndërkohë, brenda një periudhe gjashtëmujore, FSHF duhet të hartojë një plan të përmirësuar kundër diskriminimit, i cili do të shqyrtohet dhe miratohet nga FIFA.
Federata u bën thirrje tifozëve të vazhdojnë të mbështesin Kombëtaren me qytetari, duke ruajtur një sjellje të respektueshme ndaj kundërshtarëve dhe duke kontribuar në krijimin e një atmosfere pozitive. Aktualisht, FSHF është në pritje të udhëzimeve të mëtejshme nga FIFA për mënyrën e zbatimit të këtij vendimi.
