Federata Shqiptare e Futbollit është njoftuar zyrtarisht nga FIFA lidhur me një vendim disiplinor që pason ndeshjen Shqipëri–Serbi, e zhvilluar më 7 qershor 2025 në stadiumin “Air Albania”.
Në bazë të këtij vendimi, FSHF është dënuar me një gjobë prej 161,500 franga zvicerane (ose 173 mijë euro) dhe është detyruar që ndeshja e ardhshme në shtëpi kundër Letonisë të zhvillohet me të paktën 20% të kapacitetit të stadiumit të mbyllur për publikun.
Ky penalizim është rezultat i sjelljeve të përsëritura dhe të papranueshme nga një pjesë e tifozëve shqiptarë gjatë ndeshjes, përfshirë këngë me përmbajtje diskriminuese, hedhje objektesh në fushë, ndezje të mjeteve piroteknike, gjeste dhe mesazhe të papërshtatshme, si dhe ndërprerje gjatë interpretimit të himneve kombëtare.
FSHF e cilëson këtë vendim një goditje të rëndë për mbarë komunitetin futbollistik shqiptar, pasi dëmton imazhin e futbollit në vend dhe ndikon drejtpërdrejt te Kombëtarja.
Në reagimin e saj, Federata u bën thirrje të gjithë tifozëve kuqezi që të tregojnë përgjegjshmëri në mbështetjen e ekipit, duke respektuar rregullat ndërkombëtare dhe duke kontribuar për një atmosferë sportive, dinjitoze dhe përfaqësuese të vlerave të kombit shqiptar.
“Vetëm me sjellje të qytetëruara dhe mbështetje pozitive mund të ndërtojmë një atmosferë dinjitoze për Kombëtaren tonë”, thuhet në reagimin e FSHF-së.
