Festa e Shën Gjon Pagëzorit u kthye këtë vit në një ngjarje të rëndësishme për zonën e Oroshit në Mirditë, duke sjellë bashkë vendas, emigrantë dhe vizitorë të shumtë në një pelegrinazh me vlera kulturore, shpirtërore dhe turistike.
E organizuar nga disa ish-banorë të zonës, kjo festë synon të rivendosë traditën e dikurshme dhe njëkohësisht të promovojë potencialin e jashtëzakonshëm turistik të zonës, e cila njihet për pasuritë historike, natyrore dhe fetare.
“Oroshi është qendra historike e Mirditës. Oroshi ofron mundësi të shumta për të apasionuarit pas turizmit historik, kulturor dhe fetar. Kjo festë është frymëzuar nga festa e Shën Gjonit. Kjo është një lloj tradite jo vetëm për të rikthyer pelegrinazhin, por edhe për të zhvilluar turizmin”, u shpreh Julian Vlashi, drejtor i trashëgimisë kulturore.
Pelegrinazhi nisi në Abacinë e Oroshit dhe vijoi nëpër Sarajet e Gjomarkajve deri në bjeshkët e Nënshjetit, në lartësi mbi 1300 metra mbi nivelin e detit, ku u mbajt dhe një aktivitet promovues.
Synimi është që kjo festë të kthehet në një traditë të përvitshme për të bashkuar komunitetin dhe për të vënë në pah bukuritë e kësaj zone.
“Kjo është një ditë bashkimi vlerash e konceptesh”, u shpreh Aleksandër Lala, banor i zonës.
Ndërkohë, Dom Gjergj Meta, Ipeshkv i Dioqezës së Rrëshenit, theksoi rëndësinë e bashkëpunimit mes institucioneve dhe kishës, duke bërë thirrje për rikthimin e lidhjes së brezave me rrënjët e tyre: “Do t’i sugjeroja institucioneve që ta vlerësojnë më shumë bashkëpunimin me kishën. Apeli im është edhe për ish-banorët që të sjellin fëmijët e tyre për t’u treguar vendin ku kanë lindur gjyshërit e tyre”.
I pranishëm në aktivitet ishte edhe kryetari i Bashkisë Mirditë, Albert Mëlyshi.
“Jemi të gjithë bashkë këtu për të biseduar me njëri-tjetrin, por edhe për të promovuar zonën. Bashkia në bashkëpunim me qeverinë do të investojë ta kthejmë në një destinacion turistik dhe t’i shërbejë të gjithë Mirditës”, deklaroi Mëlyshi.
Kremtimi i festave fetare nëpërmjet ngjarjeve të tilla synon të shndërrohet në një traditë të qëndrueshme në fshatrat e Mirditës, si një formë për të rivitalizuar këto zona të goditura nga emigrimi dhe për të krijuar një lidhje të re mes njerëzve dhe vendlindjes së tyre.
