Publikimi i rasteve ku fermerët ishin duke përdorur pesticide dhe horomone në produkte ushqimore, ka zgjuar reagimin edhe të Prokurorisë së Përgjithshme.
Ditën e sotme organi i drejtësisë ka bërë me dije se ka nisur menjëherë verifikimet në Berat për të evidentuar çdo rast.
Prokuroria gjithashtu në njoftimin e saj iu bën thirrje të gjithë prokurorëve që të jenë të hapur ndaj informacionit kur bëhet fjalë për prekjen e opinionit publik.
“Duke marrë shkas nga denoncimet e fundit të medias së shkruar dhe asaj vizive mbi sigurinë ushqimore, ditën e djeshme, Prokurori i Përgjithshëm i është drejtuar prokurorisë së Beratit si prokurori kompetente me një kërkesë të menjëhershme për vlerësimin ligjor të të gjitha rrethanave dhe fakteve të dyshuara që mund të përbëjnë vepër penale. Përfitojmë nga rasti të falënderojmë median e njëkohësisht t’ju bëjmë thirrje të gjithë prokurorëve të ushtrojnë funksionet e tyre duke qenë të ndjeshëm dhe të vëmendshëm ndaj të gjitha burimeve të hapura të informacionit për ngjarjet sensibilizuese dhe me ndjeshmëri për opinionin publik”, thotë Prokuroria.
Përdorimi i hormoneve e madje i materialeve inerte si pluhur tulle dhe allçi në ushqimet tona, u publikua në disa emisione investigative, duke ngjallur reagim të gjerë tek të gjithë qytetarët dhe kjo sepse janë produkte ushqimore të cilat përdoren në përditshmëri dhe nga çdo grupmoshë.
