Mjeku logoped Erges Eskiu ishte i ftuar mëngjesin e sotëm në emisionin “Koha për t’u zgjuar”, ku foli për problematikat që lidhen me të folurin tek fëmijët, si dhe rëndësinë e ndërhyrjes së hershme për të shmangur vonesat në zhvillimin e gjuhës.
Ai theksoi se komunikimi dhe loja e përditshme me prindin janë thelbësore për zhvillimin gjuhësor të fëmijës:
“Fëmija ka nevojë për të paktën 30 minuta në ditë komunikim me prindin apo lojë me to.”
Sipas tij, është e rëndësishme që fëmijës të mos i jepet ndjesia se “ka diçka që nuk shkon”, pasi kjo mund të ndikojë negativisht në vetëbesimin dhe motivimin e tij:
“E rëndësishme që fëmija të mos ndjehet i paaftë apo të krijojë psikoza të tilla se nuk është i mirë mjaftueshëm në krahasim me fëmijët e tjerë. Ka merakun që prindi mbase nuk është krenar për të. Çelësi është tek motivimi.”
Eskiu sugjeroi që prezantimi i parë i fëmijës me logopedin të ndodhë që para moshës 18 muajsh, nëse ka shenja që mund të ngjallin shqetësim:
“Nëse prindi sheh që fëmija reagon, ka reagim me gjuhën e trupit, ka 5 apo 10 fjalë, është një gjendje normale dhe edhe mund të mos vijojë. Por për merak mund të bëjë një konsultë.”
Ai vuri në dukje se mosha e fëmijëve që paraqiten për konsultë është ulur ndjeshëm, pasi prindërit janë më të informuar:
“Në përgjithësi mosha kur vijnë për konsulta është ulur pasi ka prindër që janë shumë të informuar. Vijnë 18-24 muajsh. Janë më të përgatitur prindërit që t’i vijnë në ndihmë fëmijës.”
Eskiu renditi edhe disa sinjale që tregojnë se mund të jetë e nevojshme ndërhyrja e një logopedi:
- Fjalët e para si “mama”, “baba”, “dada”, zakonisht shfaqen rreth moshës 1-vjeçare.
- Bashkimi i dy fjalëve duhet të ndodhë në moshën 2-vjeçare.
- Nëse në këtë moshë fëmija nuk ka të paktën 50 fjalë, rekomandohet një konsultë.
Për sa i përket trajtimit, logopedi sqaroi se terapia ndërtohet mbi bazën e lojës, në mënyrë që fëmija të mos ndjejë se është nën trajtim:
“Terapia konsiston te loja. Fëmija nuk e kupton që po trajtohet apo që ka një problematikë. Vjen në klinikë dhe vjen për t’u argëtuar apo luajtur. Por në të njëjtën kohë edhe argëtohet.”
Në fund, mjeku theksoi se prindërit duhet të tregohen të qetë dhe të mos reagojnë me ankth nëse nuk shohin përmirësime të menjëhershme:
“Prindi duhet të ndjekë këshillat dhe të tregohet i ftohtë, jo të shqetësohet pse nuk ecin.”
