Fitim Dumani, vëllai i vogël i të penduarit të drejtësisë Nuredin Dumani, ka deklaruar se është përjashtuar nga programi i mbrojtjes së dëshmitarëve pa asnjë shpjegim nga SPAK. Në një intervistë për “Ma Shqip” me Flamur Vezaj, ai tha se vendimi i lë atë dhe familjen e tij nën rrezik të vazhdueshëm.
Sipas tij, SPAK i ka vendosur kushte që mbrojtja mund të rikthehet vetëm nëse vëllai tjetër, Dashnor Dumani, pranon të bëhet i penduar. “Më hoqën nga mbrojtja pa asnjë shpjegim dhe nuk më lejojnë të takoj as fëmijët e mi, të cilët janë në program. Më thanë se, nëse pendohet Dashnori, atëherë unë do të rikthehem në program. Por kjo nuk ka ndodhur,” tha Fitimi.
Ai tregoi se aktualisht në program janë vetëm prindërit e tij, bashkëshortja dhe vajzat, ndërsa gruaja dhe fëmijët e Nuredin Dumanit janë larguar nga Shqipëria dhe kanë marrë azil jashtë vendit. Edhe motra e tij ka kërkuar azil, por nuk e ka fituar pavarësisht garancive që, sipas saj, i kishte dhënë SPAK. Ndërkohë, familja e Dashnor Dumanit nuk është më nën mbrojtje, pasi, sipas Fitimit, po i bëhet presion që ai të pranojë të bashkëpunojë.
Dumani shprehet i shqetësuar për sigurinë e familjes, duke thënë se mbrojtja nuk ofrohet realisht nga policia. “Na kanë lënë në të njëjtin vend prej katër vitesh, aty ku shkojnë e na takojnë kriminelët. Policët nuk rrinë aty, vetëm pyesin në telefon ‘a doni të vijmë sot apo jeni në rregull?’. Madje persona në kërkim kanë shkuar e kanë takuar prindërit e mi,” rrëfeu ai.
Ai akuzoi se agjentët janë të papërgatitur dhe të lidhur me kriminelët. “Kur Nuredinin e dërgonin në vendngjarje apo spital, i jepnin pistoletë, i thoshin ‘mbaje se ti di ta përdorësh më mirë se ne’. Kjo është situata ku jetojmë,” tha Fitimi.
Për këto shqetësime, ai thotë se ka folur disa herë edhe me kreun e SPAK, Altin Dumani, por ka marrë vetëm premtime të pambajtura. “Më morën me forcë në burg dhe më thanë ‘mos ke merak’. Pas dy vitesh më përjashtuan nga programi pa asnjë shpjegim. Kur nuk doja, më mbajtën me dhunë, tani që dua mbrojtje, më nxjerrin,” tha ai.
Fitimi e akuzon SPAK se po përdor Nuredin Dumanin vetëm për propagandë dhe jo për drejtësi të vërtetë. “Unë s’kam lidhje me dëshmitë e tij. Ai ka folur për krimet e veta, ndërsa familja jonë nuk ka asnjë garanci. Fëmijët nuk lejohen të dalin as në plazh dhe unë nuk mund t’i takoj,” u shpreh ai.
SPAK, sipas “Ma Shqip”, nuk ka kthyer ende një përgjigje lidhur me akuzat e Fitim Dumanit.
