Urdhrat e ministrive nuk po zbatohen as nga institucionet e tyre të varësisë. I tillë është rasti që denoncohet nga administratori i fabrikës piroteknike “ARPI SH.P.K.” Pjetër Pëllumbi sipas të cilit Autoriteti i Kontrollit Shtetëror të Eksporteve nuk po zbaton urdhrin e Ministrisë së Mbrojtjes, raporton Euroneës Albania.
Kjo e fundit ka kërkuar brenda datës 18 nëntor të këtij viti pajisjen e shoqërisë me licencë import-eksporti, por ende kjo nuk ka ndodhur. Për shkak të kësaj amullie mes institucioneve dy kamionët e këtij subjekti gjenden prej gati një muaji të bllokuar njëri në doganën e Tiranës dhe tjetri në atë të Qafë Thanës.
“Ky është momenti më tragjik pasi në doganën e Tiranës gjendet malli i prodhuar me certifikate, i prodhuar nën kontratë me tre shoqëri italiane, prej 33 ditësh i ndaluar, ku ministrja e mbrojtjes zonja Xhaçka e ka njohur prodhimin si prodhim të ligjshëm, Ne kemi prej 22 ditësh edhe kontejnerin me lëndë të parë fitil në doganën e Qafë –Thanës që ka arritur nga India, lëndë e parë që përdoret për prodhimin piroteknike të fabrikës. A.K.SH.E nuk ka lëshuar licencën e importit”, thotë për Euroneës Albania, Pjetër Pëllumbi, administrator i kompanisë “ARPI SH.P.K”
Shkak për këtë situatë që sipas tij është e përsëritur është bërë një urdhër që ndalon hedhjen në treg të mjeteve piroteknike por që në një pikë të tij ndalon dhe import- eksportin e këtyre substancave piroteknike dhe fishekzjarrëve çka ishte dhe objekt i licencimit të biznesit të tij.
“Ky urdhër anulonte ligjin shqiptar me të cilin është certifikuar fabrika, anulonte licencën e prodhimit të lëshuar po nga ministria e mbrojtjes, anulonte standardet e këshillit të Evropës , kartat teknologjike , me fjalë të tjera fshinte nga faqja e dheut komplet këtë fabrikë. Ministria e mbrojtjes i kërkoi me shkrim ministrisë së brendshme ndërrimin e pikës dy të urdhrit ku ministria e brendshme nuk pranoi duke mos dhënë asnjë shkak”, shton ai.
Edhe pse ministria e brendshme nuk ishte dakord për revokimin apo ndryshimin e urdhrit, duke i dalë kundër ministrisë së mbrojtjes dhe asaj të sipërmarrjes, ky subjekt ka vazhduar aktivitetin madje edhe ka eksportuar.
“Ne kemi vazhduar punën me hope. Na lejoi edhe të punojmë edhe të eksportojmë. Jemi të mbyllur thjesht për një motiv korrupsionin e autoritetit të eksporteve, AKSHE. I gjendur përpara këtyre fakteve kushdo do të mendoj, ose do ta shkatërroi biznesin fare ose do t`i nënshtrohet kësaj forme të korrupsionin dhe ne arritëm të biem në njëfarë mase dakord që të vazhdonim punën duke paguar këtë mafie të veshur me pushtet”, shton ai.
Klima e të bërit biznesit në vendin tonë edhe pse reklamohet nga të gjithë qeveritë sipas tij është e ashpër dhe në dëm të çdo investitori që vjen në Shqipëri.
“Gjendur në këtë situatë çfarë do të thotë shteti, çfarë do të thotë kryeministri i Shqipërisë, çfarë do t`u thotë emigrantëve që duan të investojnë? Unë dua të flas në emër të të gjithë këtyre emigrantëve, të të gjithë investitorëve të huaj. Ja çfarë ju pret’, shtoi ai.
Kompania ARPI SH.P.K është kompania e vetme në Shqipëri e licencuar që në vitin 2006 për prodhimit piroteknik të fishekzjarrëve. Kjo kompani është ndër kompanitë e para në Evropë që u certifikua së bashku me produktet e saj me shenjën CE nga organi i autorizuar LOM i Universitetit të Madridit.
