Të dhënat nga Indeksi i Harmonizuar i Çmimeve të Konsumit (IHÇK) të publikuara nga Eurostat tregojnë se inflacioni në Shqipëri gjatë janarit 2025 ka qenë 2,4%. Ky rezultat është më i lartë krahasuar me matjet e brendshme të Institutit të Statistikave të Shqipërisë (INSTAT), i cili e vlerësoi inflacionin për të njëjtën periudhë në 1,9%.
Rritja më e lartë e çmimeve është regjistruar në grupin “Argëtim dhe kulturë”, me një rritje prej 5,8%, e ndjekur nga “Pije alkoolike dhe duhan” me 3,7%, “Mobilim, pajisje shtëpie dhe mirëmbajtje” me 3,6%, si dhe “Veshje dhe këpucë” dhe “Hotele, kafene dhe restorante”, të dyja me një rritje prej 2,9%. Grupet “Ushqime dhe pije joalkoolike” u rritën me 2,7%, ndërsa “Shërbimi arsimor” shënoi një rritje prej 1,7%.
Po ashtu, grupet “Mallra dhe shërbime të ndryshme” u rritën me 1,5%, ndërsa “Shëndeti” dhe “Komunikimi” me 1,2%. Çmimet e “Qirasë, ujit, lëndëve djegëse dhe energjisë” u rritën me 0,9%. Nga ana tjetër, sektori i “Transportit” shënoi një ulje me 1,1%.
Në nivel mujor, ndryshimi i IHÇK-së ishte 0,4%, i ndikuar kryesisht nga rritja e çmimeve të “Ushqimeve dhe pijeve joalkoolike” me 1,1%, si dhe e “Mobilimit, pajisjeve shtëpiake dhe mirëmbajtjes” me 0,5%. Grupi “Argëtim dhe kulturë” u rrit me 0,4%, ndërsa “Shëndeti” dhe “Transporti” pësuan një rritje më të lehtë prej 0,1%. Në të kundërt, çmimet e “Veshjeve dhe këpucëve” ranë me 0,4%, ndërsa “Mallrat dhe shërbimet e ndryshme” shënuan një ulje me 0,1%.
Në nivel europian, inflacioni më i lartë u regjistrua në Hungari, Rumani dhe Kroaci, ndërsa vendet me inflacionin më të ulët ishin Zvicra, Danimarka dhe Italia.
Indeksi i Harmonizuar i Çmimeve të Konsumit (IHÇK) është një matës i ndryshimit të çmimeve të mallrave dhe shërbimeve të konsumit nga perspektiva e shpenzimeve të konsumatorëve, përfshirë si vendasit ashtu edhe turistët. Ai përdoret për të krahasuar përqindjen e inflacionit mes vendeve të Europës dhe është një tregues i rëndësishëm për stabilitetin e çmimeve në Bashkimin Ekonomik dhe Monetar, duke shërbyer gjithashtu si inflacioni zyrtar i monitoruar nga Banka Qendrore Europiane.
Nga ana tjetër, Indeksi i Çmimeve të Konsumit (IÇK) është matësi zyrtar i inflacionit në Shqipëri dhe përmban 331 produkte, ndërsa IHÇK përfshin 329 produkte. Të dyja indeksët llogariten bazuar në çmime të mbledhura në të njëjtat njësi tregtare dhe ndajnë metodologji të ngjashme, por ndërsa IÇK përdoret për matjet kombëtare, IHÇK shërben për krahasime ndërkombëtare dhe monitorim të inflacionit në nivel europian./ Monitor
