Londra është goditur këtë të diel nga një valë e madhe përmbytjesh. Kësisoj, rrugët, metrotë dhe ambiente të tjera të kryeqytetit anglez i janë “dorëzuar” fuqisë së ujit. Autoritetet iu kanë bërë thirrje qytetarëve që të shmangin lëvizjet e panevojshme dhe të qëndrojnë në shtëpi,gjithashtu kanë shtuar se shira të rrëmbyeshëm pritet të ketë dhe gjatë ditës së hënës.“Nuk kam parë kurrë një përmbytje të tillë. E pabesueshme, të gjitha gjërat janë zhytur në ujë. Nuk kam parë asnjëherë një nivel të tillë përmbytjesh në Londër”, ka thënë një qytetarë.
Gjithashtu ekspertët kanë paralajmëruar se disa biznese rrezikojnë të përmbyten, me shira që pritet të mbërrijnë deri në 55 mm. Kujtojmë që ditët e fundit, Evropa Perëndimore është goditur nga përmbytje të shumta.
Në Gjermani e Belgjikë, por jo vetëm, janë regjistruar qindra viktima nga përmbytjet si dhe dhjetëra persona rezultojnë ende të zhdukur. Dëmet nga përmbytjet janë të konsiderueshme, ndërsa kryetarët e shteteve u zotuan për rimëkëmbje të gjendjes së krijuar, nga përmbytjet. Gjermania është vendi që është goditur më keq nga përmbytjet në Europën Perëndimore dhe po ashtu janë prekur edhe Holanda, Belgjika, Zvicra dhe Luksemburgu. Po ashtu përmbytje ka pasur ditët e fundit edhe në Kinë, Turqi dhe Indi.
