Kryeministri Edi Rama ditën e sotme doli në një konferencë për mediat, ku ishte i shoqëruar nga ministri Arben Ahmetaj dhe Anila Denaj një ditë pasi Shqipëria doli me 650 milionë euro borxh nga Eurobondi.
Rama tha se rezultati i Shqipërisë është spektakolar dhe se vendi ka arritur të marrë 4 herë më shumë para nga sa i nevojitej.
E ndërsa për normën e interesit është shprehur se është trajtuar në mënyrë të favorshme prej 3.65%.
“Ne kemi marrë konfirmim nga tregjet, që në radhë të parë na bën një vend të besueshëm në raport me institucionet financiare ndërkombëtare dhe na jep mundësi të zgjerojmë bazën e financimit të ekonomisë.
Për ata që thonë hë mo se borxh morët çdo njeri e di se nuk mjafton të duash të marrësh borxh por të gjesh dhe atë që të jep borxhin dhe kjo bazohet në dokumente.
Dolëm me një objektiv dhe na u ofrua 4.8 herë më shumë. Si mund t’i ofrohen një kredimarrësi të pabesueshëm ose jo solid këtë shumë. Përgjigjja është e qartë.
Shteti shqiptar është i besueshëm”, shtoi kryeministri Edi Rama.
Ministrja e Ekonomisë dhe Financave, Anila Denaj dhe Ministri për Rindërtimin, Arben Ahmetaj thanë sot se borxhi prej 650 milion euro do të shpërndahet për të rritur rrogat.
Denaj tha se ky borxh me afat shlyerje 7 vjet, do të shërbejë për reformat e qeverisë në kuadër të qëndrueshmërisë fiskale.
Ajo u shpreh:
“Shqipëria emetoi me sukses eurobondin 650 mln euro për 7 vite, me normë interesi 3.625%.
Mbi 190 investitorë ndërkombëtarë ofruan katërfishin e vlerës që ne kërkuam dhe për këtë u ndihmuam nga dy konsulentë.
Financimi do të shkojë për projektet që janë prioritare.Gjithashtu vlerësoj se eksperienca e dy ditëve të fundit, konfirmoi vlerësimin e tyre për reformat e qeverisë dhe konsolidimin fiskal”.
Nga ana tjetër, Ahmetaj u shpreh se këto para do të shkojnë për rritjen e rrogave dhe investimeve në vend.
Ai tha:
“9 qershori rikonfirmoi besimin ndaj ekonomisë shqiptare, ndaj vendit dhe autoriteteve.
Pjesa më e rëndësishme ishte ditën e djeshme ku e filluam me 4.125 çmimin fillestar dhe në dy rastet që tentuam zbritjen për të shkuar në 3.625, nuk na u larguan investitorët.
Kjo është shenjë besimi të palëkundur tek reformat dhe institucionet shqiptare. Këto do të përdoren për rritjen e pagave dhe shtimin e investimeve”.
https://www.facebook.com/edirama.al/videos/256611832098929/
