Partia Demokratike ka kërkuar dorëheqjen e një tjetër kryebashkiaku socialist, pas Valdrin Pjetrit.
Sekretari i Përgjithshëm i PD, Gazment Bardhi i ka drejtuar një letër Prokurorisë së Përgjithshme, në të cilën ka shkruar se kryebashkiaku i Vorës, Agim Kajmaku është subjekt i ligjit të dekriminalizimit.
Ai është shprehur në këtë letër se ka dyshime se Kajmaku është ndaluar në Greqi, ndaj edhe autoritetet greke kanë marrë masën e dëbimit ndaj kryebashkiakut të Vorës.
Në letër theksohet se Agim Kajmaku ka 12 vite që nuk ka udhëtuar në Greqi. Kjo është ajo që i shton edhe më shumë dyshimet.
“Në Formularin e Vetëdeklarimit shtetasi Agim Kajmaku alias Jorgo Toro ka deklarur se ka jetuar për 5 vite në Greqi. Nga verifikimi i të dhënave të sistemit TIMS rezulton se shtetasi Agim Kajmaku alias Jorgo Toro nga periudha 2004 – 2016 nuk ka udhëtuar në asnjë rast të vetëm në drejtim të Greqisë, çka përbën një indicie për saktësinë e të dhënave të bëra publike më parë.
Nisur nga interesi i lartë publik që paraqet kjo çështje, Partia Demokratike e Shqipërisë pret një verifikim dhe reagim institucional të shpejtë nga ana e Prokurorisë së Përgjithshme, me synimin që të arrihet qëllimin primar që ka ligji i dekriminalizimit.
Konkretisht, qëllimi i ligjit është të garantojë besimin e publikut në funksionimin e organeve të zgjedhura shtetërore, nëpërmjet pengimit të zgjedhjes ose emërimit në to të personave, të cilët janë dënuar për kryerjen të krimeve,” shkruhet në kërkesën për verifikimin e figurës së Agim Kajmakut, firmosur nga Gazment Bardhi.
