Partia Demokratike i ka bërë një kërkesë urgjente Prokurorisë së Përgjithshme për të verifikuar pastërtinë e figurisë së Valdrin Pjetrit. Ky i fundit u regjistrua në votime si kandidat i PS për Bashkinë e Shkodrës.
Sipas kërkesës së firmosur nga Sekretari i Përgjithshëm i PD, Gazment Bardhi, ekzistojnë të dhëna dhe dëshmi të forta publike së Pjetri nuk mund të ushtrojë funksion publik për shkak të ligjit të dekriminalizimit.
Sipas Bardhit, Vadrin Pjetri ka qënë i arrestuar në Itali në vitin 2001-2002, derisa është marrë edhe masa e dëbimit nga autoritetet italiane.
Nga verifikimi i të dhënave të sistemit TIMS, rezulton se Pjetri nga periudha 2002 – 23.03.2010 nuk ka udhëtuar në asnjë rast të vetëm në drejtim të Italisë.
“Në vitin 2001-2002, Valdrin Pjetri ka qenë i arrestuar/ndaluar në Itali (ka jetuar në Firence, Itali) dhe, më pas, ndaj tij është marrë masa e dëbimit nga autoritetet përgjegjëse italiane.
Nga verifikimi i të dhënave të sistemit TIMS rezulton se shtetasi Valdrin Pjetri nga periudha 2002 – 23.03.2010 nuk ka udhëtuar në asnjë rast të vetëm në drejtim të Italisë, çka përbën një indicie për saktësinë e të dhënave të bëra publike më parë”, thuhet në letrën e Sekretarit të Përgjithshëm të PD.
Nëse pretendimet e Gazment Bardhit verifikohen nga Prokuroria, Valdrin Pjetri nuk mundet dot që të marrë detyrën e kryetarit të Bashkisë së Shkodrës.
