Bashkëpunëtori i drejtësisë, Erjon Alibej ka dhënë informcaion që mund të çojnë në zbardhjen e disa ngjarjeve kriminale. Sipas informacioneve nga burime jozyrtare, Alibej ka rrëfyer jo vetëm ngjarje për të cilat ai vetë dyshohet ti ketë organizuar apo porositur, por edhe krime të tjera për të cilat pretendon se disponon informacione, dy prej të cilave thonë burimet, janë ngjarje të bujshme. SPAK ka tërhequr disa dosje në prokuroritë e rretheve, ndërsa hetuesit kanë nisur menjëherë verifikimin e deklarimeve të Alibejt, nëse ato përputhen apo jo me provat e deritanishme për ngjarje të caktuara.
Hetuesit menjëherë kanë nisur verifikimin e personave që janë përmendur nga Alibej. Ky i fundit përfundoi në pranga në shtator të vitit 2020, pasi akuzohet si porositës i Emiljano Ramazanit dhe Regia Runajt. Këto të fundit dyshoheshin se kishin informacione dhe ishin përfshirë në masakrën e Bradasheshit, dhjetorin e vitit 2018, ku u ekzekutua vëllai i Erjonit, Indrit Alibej, xhaxhai i tyre, Arben Dylgjeri dhe një shtëtas turk.
