Epidemia e fruthit në jugperëndim të Shteteve të Bashkuara ka shkaktuar dy viktima dhe ka numëruar gati 230 raste të konfirmuara, sipas të dhënave të fundit.
Teksasi ka raportuar 198 raste, ndërsa Nju Meksiko 30, me nga një vdekje të konfirmuar në secilin shtet. Të dy viktimat ishin të pavaksinuar.
Qendrat për Kontrollin dhe Parandalimin e Sëmundjeve (CDC) paralajmëruan për mundësinë e rritjes së rasteve, duke theksuar se fruthi është një sëmundje shumë ngjitëse që mund të shkaktojë komplikime të rrezikshme, përfshirë pneumoni dhe encefalit.
Vaksinimi mbetet mënyra më efektive për të parandaluar sëmundjen, megjithatë, shkalla e vaksinimit ka rënë pas pandemisë dhe valës së keqinformimit për vaksinat.
