“Ëndrra e tij më e madhe u bë realitet”, kështu i janë referuar mediat botërore, historisë së islandezit Felix Gretarsson, i cili është njeriu i parë në botë që iu nënshtrua një transplanti të të dy krahëve, përfshirë edhe shpatullat.
Gjendja e 48-vjeçarit shfaqet e qëndruedshme dhe duket se ai po ia del ta marrë veten pas operacionit, i cili u krye në qytetin francez, Lion.
Por pas emrit të Felix Gretarsson-it, pjesë tanimë e historisë fshihet një histori e dhimbshme.
Ishte 12 janari i vitit 1998, kur Gretarsson, me profesion elektriçist, po punonte në një shtyllë tensioni të lartë. Papritur, një valë 11 mijë voltëshe i dogji duart dhe e rrëzoi atë në tokë. Ai pësoi fraktura të shumëfishta dhe lëndime të brendshme, qëndroi për tre muaj në koma, kohë gjatë së cilës kirurgët i prenë të dy krahët.
“Operacioni ishte ëndrra e tij e madhe”, shprehet bashkëshortja e Gretarsson-it, duke shtuar se vetë ajo asnjëherë nuk e kishte konsideruar operacionin të domosdoshëm.
Nuk dihet me siguri se sa do të funksionojë vërtet kjo ndërhyrje e jashtëzakonshme kirurgjikale, që deri pak kohë më parë do të tingëllonte një çmenduri. Sipas specialistëve, pritet që krahu i djathtë të jetë më funksional se i majtë.
