Bardheblutë e Tiranës kanë zyrtarizuar blerjen më të fundit për merkaton e dimrit që ishte plot me të papritura. Me anë të një postimi në faqen zyrtare, klubi i Tiranës ka njoftuar firmosjen e kontratës me sulmuesin nga Finlanda Tim Väyrynen.
Me 27-vjeçarin finlandez bardheblutë kanë firmosur një kontratë për 1 vit e gjysmë. Duke iu referuar karakteristikave, Tim pritet të plotësojë vendin e lënë bosh pas largimit të Majkëll Ngoo. Sigurisht që nuk pritet të jetë në dispozicion të trajnerit Dede për derbin e kryeqytetit por mund të konsiderohet pa frikë si një vlerë e shtuar në ofensivën e Tiranës. Duke u rikthyer tek sfida e së enjtes, trajneri Dede pritet të hedh në fushë nga minuta e parë Taulant Seferin, i cili dha sinjale pozitive edhe gjatë debutimit të tij kundër Kastriotit.
Njoftimi i Klubit të Tiranës:
“KF Tirana njofton goditjen e re të transferimeve të janarit. Tim Väyrynen ka qenë një ndër emrat me të cilët klubi është futur në negociata gjatë këtyre javëve. Ai firmosi sot duke u zyrtarizuar si lojtar i KF Tiranës. Sulmuesi 27-vjecar vjen nga Finlanda dhe do të jetë pjesë e bardhebluve për 1 vit e gjysmë. Një emër i njohur për kampionatin finlandez dhe pjesë e kombëtares finlandeze ku ka bërë paraqitje tejet dinjitoze. Tim lë skuadrën HJK Helsinki për t’ju bashkuar klubit më të madh Shqiptar.”
