Odise Roshi është zyrtarisht futbollist i skuadrës së Bolusporit në Ligën e Parë turke. Mesfushori kuqezi ka firmosur kontratë 1 vjeçare me klubin turk, por ka të drejtë rinovimi edhe për një vit tjetër.
Futbollisti nga Fieri do të përfitojë plot 250 mijë euro në vit nga ky transferim. Roshi i bashkohet kështu edhe dy shqiptarëve të tjerë, Gentjan Selmanit dhe Dejvi Bregut, duke formuar kështu treshen shqiptare te Boluspori.
Në karrierën e tij, Roshi së fundmi ishte i huazuar te Diosgiori në Hungari dhe në momentin e përfundimit të kësaj kontrate, u rikthye tek ekipi mëmë, Akhmat Grozny në Rusi, vetëm për të tërhequr dokumentacionin.
Me skuadrën ruse, Roshi qëndroi pesë sezone, duke numëruar 95 ndeshje dhe 11 gola në Superligë. Më herët, mesfushori kuqezi ka qenë pjesë e Rijeka në Kroaci për dy sezone, si 3 vite te FSV Frankfurt në Gjermani, i transferuar nga ekipi i Koln, ku zhvilloi dy sezonet e para jashtë futbollit shqiptar.
Tashmë, Turqia do të jetë një pikë rinisjeje për mesfushorin e Kombëtares, i cili me fanellën e Shqipërisë ka zhvilluar 61 ndeshje dhe ka shënuar 5 gola. Mesfushori ka qenë një ndër lojtarët më rezultativë për Kombëtaren, ku së bashku me Sokol Cikalleshin kanë udhëhequr shpesh ekipin e drejtuar nga Reja.
