Zëvendës ministrja e Shëndetësisë, Mira Rakacolli ka qenë e ftuar ditën e sotme në studion e “News 24” për të folur mbi dy rastet e para të verifikuara me koronavirus në Shqipëri, si dhe për të shpjeguar informacionet e pasakta që kanë qarkulluar rreth këtyre rasteve në institucione e në media.
Gjatë intervistës, Rakacolli është shprehur se ndryshe nga sa dëshmoi mjekja në pikën kufitare të Muriqanit, pacienti zero, 28-vjeçari i ardhur nga Firence në fakt është kontrolluar në kufi.
Por sipas saj, simptomat e sëmundjes janë shfaqur një javë pas kalimit në doganë, ndërkohë që ka qenë në kryeqytet ku deri më tani, mësohet se ka infektuar babanë e tij 54-vjeçar.
“Atëherë historia është fare e thjeshtë, e zakonshme në epideminë e sëmundjeve infektive. Rasti ka udhëtuar në Firence, por ka bërë rrugë me makinë në veri të Italisë, ka kalur në Slloveni, Kroaci dhe hyri në Pikën Kufitare me Malin e Zi. Është e qartë që ka kaluar në zonat e kuqe të Italisë, Kroaci, Slloveni. Normal që ato momente ai nuk ka patur simptoma siç janë këshilluar kur vijnë nga zona të kuqe, të izolohen, të vendosen në karantinë.”-është shprehur Rakacolli.
Ndërsa përsa i përket ngatërresës së pikës doganore ku i riu kishte kaluar, zëvendës ministrja e Shëndetësisë u shpreh se njoftimi i parë ishte bërë duke marrë për bazë vetëm deklaratën e të riut.
“Fillimisht pyetet i sëmuri. Dhe ai deklaroi që kishte hyrë nga Hani i Hotit, Më pas prej verifikimve u pa që kishte hyrë nga Muriqani.”-tha zëvendës ministrja.
