Zoran Dimitrevski, zëvendësministër i Punëve të Jashtme të Maqedonisë së Veriut, vizitoi Korçën për të shprehur mirënjohjen e tij për 80-vjetorin e mësimit të gjuhës maqedonase në Shqipëri.
Ai falënderoi Shqipërinë për mundësinë që u është dhënë maqedonasve për të përdorur gjuhën e tyre, duke e vlerësuar këtë si një hap të rëndësishëm për ruajtjen e identitetit kulturor.
Dimitrevski theksoi se dy vendet kanë forcën për të avancuar më tej marrëdhëniet e tyre dhe për të bashkëpunuar në fusha të rëndësishme si çështjet gjuhësore, kulturore dhe integrimi në Bashkimin Evropian. Ai gjithashtu komentoi mbi ligjet që prekin përdorimin e gjuhës shqipe në Maqedoninë e Veriut, duke siguruar se ndryshimet që janë në shqyrtim nuk do të ndikojnë në përdorimin e gjuhës shqipe.
Sipas tij, këto ndryshime kanë të bëjnë vetëm me uniformimin e përdorimit të gjuhëve në disa institucione të caktuara, si ushtria dhe bankat, dhe nuk do të cenojnë të drejtat e shqiptarëve.
Dimitrevski shtoi se nuk do të ketë vendime që shkelin Kushtetutën dhe se marrëveshjet e Ohrit dhe Prespës do të respektohen. Ai theksoi se është e rëndësishme që të gjithë qytetarët e Maqedonisë së Veriut të ndihen të barabartë dhe të vlerësojnë gjithashtu gjuha maqedonase, ndërkohë që shqiptarët të jenë të sigurt për përdorimin e gjuhës së tyre.
