Kreu i demokratëve Lulzim Basha bëri me dije ditën e sotme se një pjesë e godinës së Ministrisë së Shëndetësisë është përfshirë nga flakët.
Sipas Bashës, zjarri ka rënë në katin e katërt, ku ndodhet zyra e prokurimeve.
Kryedemokrati ngre akuza, se zjarri ishte i qëllimshëm, për të djegur provat e manipulimit të kontratave që kjo ministri ka nënshkruar me privatin gjatë pandemisë.
Basha tha më tej, se ky do të jetë një test jetë a vdekje për SPAK dhe nëse dështon, do të thotë se ka lindur i vdekur.
“Çfarë ka bërë Edi Rama? 0.86% (e PBB), ndihma më e ulët në rajon. Edhe në kohë pandemie e ka mendjen për të vjedhur. Prandaj shkojnë tenderat sekretë. Paska rënë edhe zjarri në një nga katet Ministrisë së Shëndetësisë tani që SPAK filloi hetimet. E keni dëgjuar apo jo? Ka rënë zjarri në katin e katërt, te zyra e prokurimeve të Ministrisë së Shëndetësisë. Kam paralajmëruar prej kohësh që arsyeja kryesore pse Edi Rama nuk publikon kontratat e tenderave sekretë është sepse po manipulon të dhënat. Si duket nuk ia kanë dalë dot me manipulimin dhe i kanë vënë flakën. Por uroj të kenë mbetur mjaftueshëm gjurmë pasi ky është një test për jetë a vdekje për SPAK-un. Nëse dështon në këtë test, praktikisht SPAK-u i ri ka lindur i vdekur. Dua t’i bëjë thirrje prokurorëve që të procedojnë me hetimin në mënyrë transparente me publikun pasi bëhet fjalë për taksat e shqiptarëve në kohë pandemie. Të refuzojnë çdo formë presioni apo joshje nga Ëngjëll Agaçi, Taulant Balla, Ulsi Manja dhe korrierët e tjerë të Edi Ramës të cilët ushtrojnë presion ndaj SPAK-ut për të mbyllur hetimet për korrupsionin. Askush nuk ka për t’i falur nëse nuk ngrihen në lartësinë e detyrës për të cilën u krijuan, për të luftuar korrupsionin”, u shpreh Basha.
Gjatë periudhës së pandemisë, PD ka denoncuar tenderat e klasifikuar sekret nga qeveria për blerjen e pajisjeve mjekësore, duke akuzuar për blerje me dyfishin apo tre fishin e çmimit të tregut.
Prokuroria e Posaçme ndërkohë ka nisur verifikimet për denoncimet publike.
