Pasojat e tërmetit të ditës së djeshme ishin katastrofike.
Deri më tani numërohen 32 viktima, 45 të shpëtuar, ndërsa persona të tjerë vijojnë të jenë nën rrënoja.
Zonat më problematike janë Thumana dhe Durrësi, ku po punohet ende për nxjerrjen e trupave nga rrënojat.
Në ndihmë të Shqipërisë kanë ardhur trupa nga Kosova, Greqia, Italia dhe vende të tjera të BE-së.
Ditën e djeshme forcat shpëtimit nxorrën nga rrënojat 17-vjeçarin Ramë Lala në Kënetë të Durrësit.
Ky i fundit humbi mamanë dhe njërin prej vëllezërve, ndërsa anëtarët e tjerë të familjes janë zhdukur.
Në këtë zonë janë pozicionuar 160 zjarrfikës italianë.
Njëri prej tyre ka mbushur me shpresë shqiptarët, duke thënë se në Aquila kanë arritur të nxjerrin nga rrënojat edhe njerëz që kishin aty 72 orë.
“Jemi 160 zjarrfikës italianë, të specializuar në kërkimin poshtë rrënojave. Do të vijnë edhe të tjerë. Ka ende kohë, në Akuila kemi shpëtuar njerëz që kishin 72 orë nën rrënoja. Gjithmonë punojmë me objektivin për të shpëtuar njerëz”, deklaroi zjarrfikësi italian.
