Rreth 17,000 banorë janë detyruar të braktisin shtëpitë në provincën kanadeze të Manitobës, për shkak të zjarreve të fuqishme që po përhapen me shpejtësi në disa pjesë të vendit.
Situata më e rëndë paraqitet në zonat e thella dhe të izoluara, ku evakuimi është bërë i mundur vetëm falë ndërhyrjes së avionëve ushtarakë dhe helikopterëve.
Ndërkohë, zjarrfikësit vazhdojnë betejën e vështirë me flakët që po bëhen gjithnjë e më agresive. Temperaturat e larta dhe mungesa e reshjeve parashikohet të zgjasin edhe për disa ditë, duke rritur rrezikun dhe vështirësitë në terren.
Tymi i dendur nga mbi 188 vatra aktive është përhapur përtej kufijve të Kanadasë, duke ndikuar edhe në disa shtete amerikane.
Provincat Manitoba dhe Saskatchewan kanë shpallur gjendjen e jashtëzakonshme për të paktën një muaj dhe kanë kërkuar ndihmë ndërkombëtare për të përballuar emergjencën.
Vetëm në Saskatchewan janë regjistruar aktualisht 17 zjarre, nga të cilat tetë janë jashtë kontrollit. Autoritetet e Qendrës Kanadeze për Koordinimin e Zjarreve Pyjore e kanë cilësuar situatën si ekstreme.
Kryeministri i Saskatchewan-it, Scott Moe, paralajmëroi se numri i të evakuuarve, që tashmë ka arritur në rreth 8,000 persona, mund të kapë shifrën e 10,000 nëse kushtet atmosferike nuk përmirësohen.
“Katër deri në shtatë ditët e ardhshme do të jenë vendimtare. Na nevojitet një ndryshim në kushtet e motit dhe lutemi për reshje të dendura shiu në veriun e vendit,” tha Moe në një deklaratë publike.
Evakuime të detyruara janë urdhëruar edhe në pjesë të mëdha të provincave Alberta dhe Kolumbia Britanike.
Forcat e Armatosura Kanadeze, Shërbimi i Zjarreve në Natyrë i Manitobës dhe ekipet e specializuara të shpëtimit urban janë mobilizuar për transportimin ajror të banorëve nga komunitetet më të rrezikuara drejt zonave të sigurta.
