Me mbi 90% të votave me postë të numëruara nga zgjedhjet parlamentare të 9 shkurtit në Kosovë, Lëvizja Vetëvendosje vazhdon të kryesojë me mbi 51% të votave, apo më shumë se 28.000 vota, sipas të dhënave të Komisionit Qendror të Zgjedhjeve.
Pas saj renditen Lidhja Demokratike e Kosovës (LDK) me mbi 30%, Partia Demokratike e Kosovës (PDK) me mbi 9% dhe koalicioni Aleanca për Ardhmërinë e Kosovës – Nisma me mbi 3%.
Numërimi i votave me postë, i cili filloi më 28 shkurt pasi KQZ miratoi mbi 63.000 pako me fletëvotime, pritet të përfundojë brenda ditës. Më pas, do të nisë edhe numërimi i votave me kusht dhe i atyre të personave me aftësi të kufizuara.
Bazuar në rezultatet aktuale, të cilat përfshijnë votat në qendrat e votimit brenda Kosovës, ato në përfaqësitë diplomatike dhe me postë, asnjë parti nuk ka siguruar shumicën e nevojshme për të qeverisur e vetme. Për të pasur një shumicë parlamentare, duhen të paktën 61 deputetë nga 120 gjithsej, ndërsa Vetëvendosje ka arritur deri tani në 48 vende në Kuvend.
Kryeministri Albin Kurti ka deklaruar se synon ta formojë qeverinë pa partnerë të tjerë, ndërsa partitë opozitare, me përjashtim të Nismës, e kanë përjashtuar mundësinë e një koalicioni me të.
Procesi i numërimit ka hyrë tashmë në javën e katërt, dhe certifikimi i rezultateve nga KQZ-ja pritet të bëhet në mes të këtij muaji. Ndërkohë, analistët po shqyrtojnë disa skenarë të mundshëm për formimin e qeverisë së re.
