Mëngjesin e djeshëm u raportua për një person të plagosur në Shkodër.
27-vjeçari Vesel Koçeku mbeti i plagosur pas një konflikti për motive të dobëta.
Gjendja shëndetësore e të riut është jashtë rrezikut për jetën.
Tashmë policia ka bërë të ditur se është zbardhur ngjarja në Shkodër si dhe është identifikuar autori i dyshuar.
Po ashtu rezulton se Vasel Koçeku është vënë në pranga pasi ka thyer masën e sigurisë “Arrest në shtëpi”.
Në lidhje me ngjarjen, në kërkim është R. Z. 30 vjeç, banues në lagjen “Skënderbeg”, Shkodër i cili është autori i dyshuar.
Është ndaluar gjithashtu edhe 32-vjeçari Eduard Doçaj, banues në fshatin Grudë e Re, Shkodër, për “Moskallëzimi i krimit”.
Njoftimi i policisë:
Shërbimet e Drejtorisë Vendore të Policisë Shkodër dhe grupi hetimor, nën drejtimin e Prokurorisë së Rrethit Gjyqësor Shkodër, kanë bërë zbardhjen e ngjarjes së ndodhur rreth orës 03:30 të mëngjesit të datës 04.06.200, ku u plagos me armë zjarri shtetasi Vasel Koçeku, 27 vjeç.
U bë e mundur zbardhja e ngjarjes, identifikimi dhe shpallja në kërkim e autorit të dyshuar, shtetasit R. Z. 30 vjeç, banues në lagjen Skënderbeg, Shkodër, për veprën penale “Plagosja e lehtë me dashje”.
Gjithashtu është bërë ndalimi i shtetasit Vasel Koçeku, 27 vjeç, banues në fshatin Boriç i Vogël, Malësi e Madhe, për veprën penale “Largimi i të burgosurit nga vendi i qëndrimit”, i cili ka qenë me masë sigurie “Arrest në shtëpi”, pasi kishte dalë me leje të posaçme për efekt të COVID-19.
Gjithashtu u bë ndalimi i shtetasit E. D., 32 vjeç, banues në fshatin Grudë e Re, Shkodër, për veprën penale “Moskallëzimi i krimit”. Nga veprimet e para hetimore rezulton se kjo ngjarje ka ndodhur për motive të dobëta. Materialet iu referuan Prokurorisë së Rrethit Gjyqësor Shkodër, për veprime të mëtejshme.
