Ministri i Jashtëm në detyrë, Gent Cakaj, njoftoi sot se dy diplomatë iranianë janë dëbuar nga Shqipëria.
Diplomatët janë shpallur persona të padëshiruar.
Sipas Cakajt Mohammad Ali Arz Peimanemati dhe Seyed Ahmad Hosseini Alast, kanë zhvilluar veprimtari në mospërputhje me statusin e tyre dhe parimet e Konventës së Vjenës për Marrëdhëniet Diplomatike.
Zëri i Amerikës ka bërë me dije se dy diplomatët u dëbuan për aktivitete kundër MEK.
Atasheu kulturor Seyed Ahmed Hosseini Alast ka mbajtur poste të larta në Gardën Revolucionare të Republikës Islamike, kurse Mohamed Peimanemati ka qenë anëtar i njësisë operacionale të inteligjencës së Iranit Mois.
Po ashtu, ai është përgjegjës për disa akte terroriste në vendet e BE-së.
Sipas VOA, ata kanë qenë bashkëpunëtorë të Kasem Soleimanit.
Kjo nuk është hera e parë që Shqipëria dëbon zyrtarë iranianë.
Kujtojmë se në 2018 është dëbuar ambasadori iranian, pas shkatërrimit të celulës terroriste nga policia shqiptare.
Qassim Soleiman kishte qenë po ashtu drejtues edhe në këtë celulë.
