Detaje të reja dalin në lidhje me ngjarjen në Shkodër ku ju vu tritol Suida Kukës. Mësohet se aktualisht policia e shtetit nuk ka asnjë autor të dyshuar për vendosjen e ekspozivit në makinën e Kukës. Kamuflimi lëndës plasëse ka qenë i mirë, pasi ishte fshehur në një paketim moltoje, por dikush e ka pikasur pasi ka qenë një telefonatë ajo që ka alarmuar policinë e Shkodrës, e cila shkoi menjëherë në vendin e ngjarjes dhe pas këqyrjes poshtë mjetit u konstatua lënda plasëse që ishte fshehur brenda një qeseje moltoje për të hequr dyshimet.
Ndërkohë bëhet me dije se nga këqyrja e kamerave të sigurisë u pa se autori ka ardhur në vendin e ngjarjes me një motoçkletë dhe pasi ka vendosur te një nga gomat eksplozivin, e përshtatur me një pajisje të telekomanduar, është larguar. Ndonëse ka pamje, kamerat e sigurisë nuk e shquajnë fytyrën e autorit të ngjarjes, ndërsa policia ende nuk ka rënë në gjurmët e tij.
Nuk dihet akoma motivi , sepse në dëshminë e saj Kuka tha se nuk kishte asnjë konflikt me askënd.
“Nuk kam konflikte me askënd. Nuk e di nga erdhi nga ngjarje. S’kam asnjë shqetësim apo konflikt as në punë.”, mësohet të këtë thënë para oficerëve të policisë.
Nga ana tjetër, policia ka dyshime se ngjarja mund të ketë ndodhur për shkak të detyrës së Kukës si drejtoreshë e Operatorit të Kujdesit Shëndetësor. Aktualisht policia po heton në lidhje me ngjarjen në fjalë, identifikimin dhe arrestimin e autorit/ve.
