Një zbulim i jashtëzakonshëm që pritet të ndikojë në rishkrimin e historisë arkeologjike të Europës është bërë në brigjet shqiptare të liqenit të Ohrit.
Gjatë një projekti të përbashkët mes arkeologëve shqiptarë dhe atyre zviceranë është identifikuar një vendbanim i periudhës nga 8000 deri në 4000 vjet para erës sonë, më i vjetri i dokumentuar deri më sot në kontinent.
Gërmimet po zhvillohen në zonën e Buqezës, ku ekipi i Universitetit të Bernës dhe ekspertë shqiptarë janë angazhuar në kërkime intensive, si në tokë ashtu edhe në nënujor, për të zbuluar gjurmë të jetës parahistorike në këtë territor.
Ambasadorja e Zvicrës në Shqipëri, znj. Ruth Huber, gjatë një vizite në terren vlerësoi kontributin e ekspertëve shqiptarë dhe e cilësoi këtë iniciativë si një model të bashkëpunimit shkencor dhe kulturor mes dy vendeve.
Ajo nënvizoi se projekti mbështetet nga qeveria zvicerane si pjesë e angazhimit për zhvillimin dhe ruajtjen e trashëgimisë në Shqipëri.
Arkeologu shqiptar Adrian Anastasi bëri të ditur se faza e parë e kërkimeve është drejt përfundimit dhe deri tani janë zbuluar dhjetëra objekte me rëndësi të madhe arkeologjike, që pasurojnë ndjeshëm historinë e zonës.
Ndër gjetjet më të veçanta është një gardh prej druri, i ruajtur në kushte të shkëlqyera nën ujë, që dëshmon për një organizim të hershëm të jetës komunitare dhe përpjekjet për mbrojtjen e vendbanimeve.
Sipas profesor Albert Hafner, drejtues i ekipit zviceran, zona e Linit përfaqëson një nga sitet më të ruajtura në Europë dhe ofron të dhëna të paçmueshme për fillimet e qytetërimit evropian.
Zbulimet në Lin dhe Buqezë po ngjallin interes të gjerë në rrethet akademike dhe kulturore europiane, duke e kthyer këtë zonë shqiptare në një qendër të rëndësishme për kërkimin arkeologjik dhe trashëgiminë kulturore.
Përveç rëndësisë shkencore, projekti shërben si një urë e fortë bashkëpunimi ndërmjet Shqipërisë dhe Zvicrës në promovimin dhe ruajtjen e historisë së përbashkët njerëzore.
