Nuredin Dumani i arrestua në Fier rreth dy muaj më parë ka pranuar të bashkëpunojë me drejtësinë, duke marrë statusin e të penduarit.
Ndërkohë që ditën e sotme Nuredin Dumanit , te penduarit te drejtesise, i komunikohet masa e sigurisë “arrest me burg” në ambientet e spitalit.
Vlen të theksojmë se Dumani është rrëfyer para drejtësisë duke zbardhur disa nga vrasjet më të të bujshme në vend.
Në bazë të rrëfimit të Nuredin Dumanit, SPAK para dy ditësh ka realizuar një mega operacion, ku ka lëshuar 32 urdhër-arreste.
Por në mes të arrestuarve në kuadër të operacionit “Golden Bullet” evidentohet edhe emri i avokatit Alban Bengasi. Emri i tij, lidhej me dhunën e ushtruar ndaj ish-bashkëshortes Blerta Ryçi, në 31 janar të 2020.
Sipas dëshmisë së Nuredin Dumanit, Bengasi ka kërkuar që t’i torturohej e vritej e shoqja, pasi dyshonte se e kishte tradhtuar me shokun e ngushtë. Gruaja u dhunua teksa qëndronte në makinë. Sipas prokurorisë, një person u afrua dhe e qëlloi me grushte për minuta të tëra e si pasojë ajo humbi vetëdijen për të paktën 9 ditë, megjithatë arriti t’i tregojë hetuesve identikitin e autorit duke thënë se ai ishte një person i moshës 28-33 vjeç, rreth 178 cm i gjatë, ezmer, flokë të errët të shkurtër.
Më shumë se dy vite pas kësaj ngjarje, i penduari i drejtësisë Nuredin Dumani u ka thënë hetuesve se porositësi i këtij sulmi ishte pikërisht bashkëshorti i saj Bengasi me të cilin në atë kohë ajo ishte në proces divorci. Sipas Dumanit, Bengasi e donte të vdekur bashkëshorten e tij pasi dyshonte se ajo e kishte tradhtuar me shokun e tij të ngushtë.
