Kryetari i Grupit Parlamentar të Partisë Demokratike (PD), Gazment Bardhi, dhe kryetarja e Komisionit të Integrimit, Jorida Tabaku, zhvilluan një takim me disa deputetë të Parlamentit Europian, të cilët ndodheshin në një vizitë zyrtare në Tiranë.
Deputetët e PD-së përmendën rëndësinë e reformës zgjedhore dhe luftës kundër korrupsionit për Shqipërinë.
Bardhi shprehu qëndrimin se qeverisja e Edi Ramës ka shfaqur të gjitha tiparet e kapjes së plotë të shtetit, e konsideruar si forma më e lartë e korrupsionit. Kjo situatë, sipas tij, pengon përparimin e Shqipërisë dhe e detyron atë të largohet nga rruga e vetme e sigurt drejt anëtarësimit në Bashkimin Europian.
Njoftimi i plotë:
Kënaqësi takimi me delegacionin e Parlamentit Europian, me të cilët sëbashku me kolegen Jorida Tabuku ndamë qëndrimin tonë për nevojën imediate që ka Shqipëria për një reformë zgjedhore të plotë dhe gjithëpërfshirëse; forcimin e luftës kundër korrupsionit dhe krimit të organizuar dhe respektimin e shtetit ligjor.
Keqqeverisja e Edi Ramës ka tashmë tiparet e plota të kapjes së shtetit, si forma më e lartë e korrupsionit. Kjo nuk po e lejon Shqipërinë të bëjë përpara, duke devijuar nga e vetmja rrugë e sigurt e së ardhmes, që është anëtarësimi në Bashkimin Europian.
