Prokuroria e Tiranës ka zbardhur mekanizmin e vrasjes së gjyqtarit të Apelit, Astrit Kalaja, i cili u ekzekutua më 6 tetor në ambientet e Gjykatës së Apelit nga Elvis Shkambi. Hetimet dhe pamjet e kamerave të sigurisë kanë ndihmuar në rindërtimin e ngjarjes së rëndë që tronditi sistemin e drejtësisë.
Sipas Prokurorisë, Elvis Shkambi, së bashku me xhaxhain e tij Gjon Shkambi dhe dy të afërmit Ervis e Ragip Kurtaj, kanë hyrë në sallën e gjyqit numër 3, ku zhvillohej seanca për një çështje pronësie në Shkodër. Pas shpalljes së vendimit nga gjyqtari Kalaja, që rezultoi kundër interesave të palës së Shkambajve, Elvis Shkambi ka nxjerrë armën dhe ka qëlluar disa herë në drejtim të gjyqtarit.
Gjyqtari Astrit Kalaja është goditur në gjoks dhe ka ndërruar jetë në vend. Më pas, autori ka qëlluar në drejtim të babë e bir Ragip dhe Ervis Kurtaj, pjesë e palës tjetër në proces. Të dy kanë mbetur të plagosur, Ervisi në krahun e djathtë dhe Ragipi në anën e majtë të brinjëve.
Pas krimit, policia ka sekuestruar armën e zjarrit të përdorur nga Shkambi. Gjatë kontrolleve të mëvonshme, është gjetur edhe automjeti tip “Mercedes-Benz” me targë AA900AA, në pronësi të Gjon Shkambit, ku u sekuestruan 31 fishekë të kalibrit 9 mm.
Sipas hetimeve paraprake, vrasja ka ndodhur menjëherë pas shpalljes së vendimit gjyqësor, në momentin kur Elvis Shkambi ka humbur kontrollin dhe ka qëlluar drejt trupit gjykues. Prokuroria e Tiranës po vijon hetimet për zbardhjen e plotë të ngjarjes dhe përfshirjen e personave të tjerë në ndihmë të autorit të krimit.
