Gjykata Kushtetuese ka konstatuar se tre nivele të gjyqësorit, Gjykata e Posaçme e Shkallës së Parë, Apeli dhe Gjykata e Lartë, kanë shkelur Kushtetutën dhe kanë cënuar lirinë personale të ish-gjyqtares së Apelit të Korçës, Mimoza Margjeka.
Vendimi erdhi pas shqyrtimit të një ankese të paraqitur nga vetë Margjeka, e cila kërkonte shuarjen e masës së sigurisë “arrest në shtëpi”, pasi sipas saj ishte tejkaluar afati ligjor prej 9 muajsh.
Kjo kërkesë ishte refuzuar në të tre shkallët e gjykimit, me argumentin se masa e “arrestit në shtëpi” nuk i nënshtrohej të njëjtave afate si “arresti në burg”, dhe se ajo mund të zgjasë deri në 18 muaj.
Por Kushtetuesja rrëzoi këtë interpretim, duke theksuar se gjykatat e mëparshme kanë bërë një gabim të rëndë në zbatimin e ligjit. Në vendimin e arsyetuar nga tetë gjyqtarë kushtetues, theksohet se Gjykata e Lartë ka ndërtuar në mënyrë të papranueshme një normë të re procedurale, duke dyfishuar afatin e masës së arrestit në shtëpi, një veprim që bie ndesh me parimet kushtetuese dhe liritë themelore të individit.
Mimoza Margjeka ishte dënuar në dhjetor 2023 nga SPAK me 4 vjet e 6 muaj burg për korrupsion, dënim i cili u konvertua në 3 vite shërbim prove. Gjatë procesit, ajo qëndroi në “arrest shtëpie”, por pas përmbushjes së 9 muajve, kërkoi që kjo masë të hiqej.
Gjykata Kushtetuese nuk ka urdhëruar rigjykim të çështjes, pasi masa tashmë është shuar me përfundimin e procesit penal.
Megjithatë, ka vendosur të shfuqizojë vendimet e mëparshme të tre gjykatave, duke i cilësuar si të papajtueshme me Kushtetutën dhe duke vënë në dukje cenimin e të drejtave të ish-gjyqtares.
