Ish-kryeministri Sali Berisha, ka reaguar sërish në lidhje me kërkesën e ambasadores së SHBA-së në Tiranë, Yuri Kim. Me anë të një postimi në rrjetet sociale, Berisha ka kujtuar betimin që ka bërë disa vite më parë, përpara demokratëve, gjatë një aktiviteti të mbajtur në atë kohë për 25-vjetorin e Partisë Demokratike.
Në fjalën e tij në postimin që ka bërë në rrjetet social, Berisha deklaron se do të qëndroj deri në fund pjesë e PD-së, edhe sikur të ngelet i vetëm.
Reagimi i ish-kryeministrit, vjen në një kohë kur ambasadorja amerikane, Yuri Kim kërkoi nga kryedemokrati Lulzim Basha që Berisha të mos jetë pjesë e Parlamentit në shtator.
“Ju përshëndes miq me betimin tim solemn para demokrateve të Shqipërisë”, shkruan Berisha, i cili më pas thotë se do të qëndrojë deri në fund edhe nëse do të jetë i vetëm.
“Sikur 1000 të mbeten, do të mbetem njëri prej jush. Sikur 100 të mbeten, do mbetem njëri prej jush. Sikur vetëm njëri të mbeti, do të jem njëri prej jush. Rroftë PD, Zoti i bekoftë demokratët!”, thotë Berisha në video.
Kujtojmë se Yuri Kim, pas një takimi që zhvilloi disa ditë më parë me kryedemokratin Lulzim Basha, u shpreh se ish-kryeministri Sali Berisha, i shpallur non-grata nga DASH, nuk duhet të jetë më në Parlament.
