Më 10 maj 1913, qeveria e Ismail Qemalit dekretoi “Kanunin e zhurisë”, si aktin e parë juridik për organizimin dhe funksionimin e sistemit juridik në shtetin e pavarur shqiptar dhe prej 107 vitesh kjo datë përkujtohet si Dita Kombëtare e Drejtësisë.
Kështu, ish-kryetari i Komisionit të Reformës në Drejtësi dhe ish-ministri i Brendshëm Fatmir Xhafaj, ka kujtuar këtë ditë dhe nëpërmjet një statusi në Twitter shkruan se ka besim në Reformën në Drejtësi, e cila do të sjellë drejtësinë e munguar.
Xhafaj shkruan se kjo reforme e re do të përballojë korrupsionin, krimin, abuzimin dhe arrogancën ndaj pushtetit.
Teksa analizon procesin e reformimit të sistemit të drejtësisë, ish-ministri Xhafaj bën thirrje që ky projekt madhor të mbahet larg nga deformimet dhe ndikimet.
“Dita e Drejtësisë! Jemi në procesin e reformimit të saj. Ka shumë punë, sfida për t’u përballur për ta realizuar atë siç e ideuam dhe miratuam. Fokus e axhendë konkrete pune, jo fjalime, statuse dhe premtime të pambajtura. Kryesorja, ta mbrojmë procesin nga ndikimet dhe deformimet. Kërkohet më shumë përgjegjshmëri e transparencë, kurajo e guxim nga vetë institucionet e reja të drejtësisë. Shembulli i 3 gjyqtarëve të rinj të Gjykatës së Lartë, çfarë ata janë duke bërë në pak javë, është ajo çfarë qytetarët presin nga drejtësia e re. Besoj fort te reforma në drejtësi, te e ardhmja e saj. E sigurt që kurrësesi nuk do të jetë si deri më sot, por shumë më e mirë, më e drejtë, funksionale, efiçente dhe kryesorja me njerëz me integritet dhe të aftë profesionalisht. Koha për drejtësinë e munguar! Drejtësi e re me kurajo e më me forcë ballë korrupsionit dhe krimit, abuzivizmit dhe arrogancës së pushtetit ndaj qytetarëve. Koha për t’i dhënë fund pandëshkueshmërisë, për të dhënë dhënë shpresë e besim për shtetin e së drejtës. Ata që e duan siç e kishin DJE ta harrojnë! Ajo vdiq. Ata që edhe NESËR e duan si dje, s’paskan kuptuar ende asgjë nga reforma. E mendojnë e veprojnë gabim. Është ndërtuar e tillë që të jetë ndryshe dhe për ta. Drejtësi të barabartë për të gjithë, drejtësi në shërbim të qytetarëve,”– shkruan Xhafaj.
Dita e Drejtësisë! ⚖️Jemi në procesin e reformimit të saj. Ka shumë punë, sfida për t'u përballur për ta realizuar atë siç e ideuam & miratuam. Fokus e axhendë konkrete pune, jo fjalime, statuse dhe premtime të pambajtura. Kryesorja, ta mbrojmë procesin nga ndikimet & deformimet.
— Fatmir Xhafaj (@FatmirXhafaj) May 10, 2020
