Një vullkan në Islandë që hedh llavë në qiell që kur shpërtheu të Premten e kaluar mund të vazhdojë shfaqjen e tij spektakolare për vite me rradhë, duke u bërë potencialisht një atraksion i ri turistik në ishullin e njohur për mrekullitë e tij natyrore.
Mijëra Islandezë janë dyndur në vendin e shpërthimit në Gadishullin Reykjanes, rreth 30 kilometra në jugperëndim të kryeqytetit, duke shpresuar të jenë të mrekulluar nga burimet e rralla të lavës dhe madje të gatuajnë një vakt në kore të ndezur të magmës. Pamjet e dronëve të filmuara mbi krater tregojnë lavën e shkrirë që bubullon dhe çel, dhe shpërthen në anët e vullkanit.
“Është një shpërthim i përsosur turistik”, tha profesori i vullkanologjisë në Universitetin e Islandës, Thorvaldur Thordarson.
Për të përballuar grumbujt e vizitorëve, autoritetet në Islandë ngritën një shteg shëtitjeje 3.5 kilometra (2.2 milje) në vendin e shpërthimit dhe janë duke patrulluar në zonë për të parandaluar vëzhguesit që të dilnin në zona të rrezikshme të ndotura nga gazrat vullkanikë. “Njerëzit po ecnin nga shumë drejtime të ndryshme në zonë”, tha për Reuters Agust Gunnar Gylfason, menaxher i projektit në Departamentin e Mbrojtjes Civile dhe Menaxhimit të Emergjencave.
Gylfason vlerësoi se më shumë se dhjetë mijë njerëz kishin dalë në vend që nga e premtja në mbrëmje, disa prej të cilëve kishin nevojë për shpëtim për shkak të motit të ashpër dhe udhëtimeve pa ushqim të mjaftueshëm ose veshje të përshtatshme. Që nga shpërthimi fillestar, llava ka dalë vazhdimisht nga vullkani me një shpejtësi prej 5 deri në 10 metra kub në sekondë, tha Thordarson, një rrjedhë mjaft e fortë për të siguruar që lava të mos ngurtësohet dhe të mos mbyllë çarjen. Për tani.
“Nëse bie nën tre metra kub, ka shumë të ngjarë që shpërthimi të ndalet”, tha Thordarson.
Ai e krahasoi fluksin e lavës me atë të shpërthimit të Pu’u ‘O’o në Hawaii, i cili filloi në 1983 dhe vazhdoi të shpërthente për 35 vjet. “Mund të mbarojë nesër ose mund të vazhdojë edhe pas disa dekadash.”
