Ka përfunduar në Bruksel takimi i parë ndërmjet kryeministrit të Kosovës, Albin Kurti, dhe presidentit të Serbisë, Aleksandar Vuçiç. Ky i fundit deklaroi se negociatat me delegacionin e Prishtinës nuk ishin aspak të suksesshme. ”Ata vetëm na kërkuan të themi kur do ta njohim pavarësinë e Kosovës. Shqiptarët nuk erdhën në dialog, por vetëm për të provokuar dhe provokuar reagimin e Beogradit”, tha fillimisht Vuçiç.
Presidenti i Serbisë thotë se ishte rënë dakord që dialogu të vazhdojë deri në fund të korrikut, por gjithashtu deklaroi se ai nuk do të marrë pjesë në një takim të tillë, për shkak të mungesës së përgjegjësisë dhe realitetit nga ana e Prishtinës.
Vuçiç u shpreh se delegacioni i Prishtinës nuk dëshiron të përmbushë marrëveshjet e nënshkruara nga shqiptarët dhe nuk dëshiron të diskutojë mbi Bashkimin e Komunave Serbe.
”Ata i quajnë incidente dhe provokime fakti që serbët duan të marrin pjesë në liturgji në kishat e tyre. Isha shumë i sjellshëm, sepse nuk doja të vija në dukje gjëra të tjera, për shkak të mungesës së plotë të një përgjigjeje realiste.
Ne jemi të gatshëm të pranojmë çdo datë dhe ditë për vazhdimin e bisedimeve, kjo është shumë e rëndësishme dhe nuk ka asgjë më të rëndësishme për ne sesa sigurimi për njerëzit tanë në Kosovë dhe Metohi dhe respektimi i gjithçkaje të nënshkruar”, përfundoi presidenti i Serbisë, Vuçiç.
