Të gjithë fëmijët iu drejtuan ditën e sotme bankave të shkollës.
Mirëpo 8-vjeçarja, Lefteri Kola nga Fieri, nuk pati mundësi të bëntë një gjë të tillë.
Ajo rrëfeu për “Report tv”, se është e paralizuar dhe nuk mund të ikë dot, ndërsa ka kërkuar edhe ndihmë nga shteti.
“Unë jam Lefteri Kola, jam e paralizuar, dua të më ndihmojë shteti, të iki edhe unë në shkollë si shokët e mi. Isha klasë e parë , hidhem e dyta. Dua të mësoj shumë, por nuk mund të iki dot”, thotë 8-vjeçarja.
Familja e sa përbëhet nga 12 persona dhe sëmundja e vajzës ua ka vështirësuar jetën.
Nëna e saj shprehet se vajza vuan nga një formë reumatizme, që mund të shkaktojë vdekjen.
Ajo aktualisht është shtëpiake, ndërsa burrin e ka të papunë.
“Është e sëmurë po bën 6 muaj, dhe nuk ka dhe nuk kemi asnjë lloj shprese për shërim. E kanë nxjerrë me një lloj reumatizme që mund të jetë edhe vdekjeprurëse. Dhe në shkollë për arsye se nuk kemi mundësi ekonomike. Ne jemi një familje e madhe, 12 frymë, dhe jemi në kushte shumë të vështira ekonomike. Asgjë nuk kemi, unë jam shtëpiake dhe burrin e kam pa punë. Është shumë e vështirë se do shumë para. Ne po vemi këtu në Shqipëri, pale jashtë shtetit që do shumë para që të vesh”, thotë nëna.
Ndërkohë gjyshi i saj, Kozma Kola, i cili e ka ndjekur hap pas hapi mbesën, tregon se ajo nuk ka asnjë përmirësim nga ilaçet.
Më tej ai ka kërkuar ndihmën e shtetit, që mbesën e tij ta çojnë jashtë shtetit për mjekim.
