Shtatë ushtarë izraelitë u vranë të martën në jug të Rripit të Gazës, pasi automjeti i blinduar me të cilin po udhëtonin u godit nga një pajisje shpërthyese.
Ngjarja ndodhi në zonën e Khan Younis, ku sipas hetimeve paraprake të ushtrisë izraelite, një militant palestinez vendosi një bombë në mjetin ushtarak, ndërsa ai ishte në lëvizje.
Pavarësisht përpjekjeve për të shuar flakët që shpërthimi shkaktoi, askush nga ushtarët nuk arriti të shpëtonte.
Ministri izraelit i Mbrojtjes, Israel Katz, reagoi pas ngjarjes përmes një postimi në rrjetin social X, duke shprehur ngushëllimet për familjet e të rënëve dhe theksoi se “ushtarët tanë ranë në përpjekje për të mbrojtur shtetin e Izraelit dhe për të kthyer pengjet tona”.
Ky incident e çon në 440 numrin e ushtarëve izraelitë të vrarë që nga nisja e ofensivës tokësore kundër Hamasit në Gaza. Kjo fushatë nisi pas sulmit të 7 tetorit 2023, kur militantë të Hamasit sulmuan Izraelin jugor, duke lënë pas rreth 1,200 të vrarë dhe 251 pengje.
