Ditën e djeshme qyteti i Mallakastrës u trondit, pasi një 50 vjeçare u gjend e vrarë në një rezervuar.
Ajo ishte vrarë nga nipi i burrit dhe dy shokët e tij, të cilët kishin hyrë në shtëpinë e viktimës për ta grabitur.
Mirëpo, viktima i kishte njohur dhe kishte bërë rezistencë.
Grabitësit e rrëmbyen e më pas e vranë, duke e hedhur në një rezervuar.
Së fundmi, tre të rinjtë e kanë pranuar krimin.
Nipi i burrit të viktimës, L. Saliaj, ka filluar të qajë gjatë marrjes në pyetje nga oficerët e Policisë.
16-vjeçari ka thënë se iu duheshin para, por çdo gjë iu iku nga kontrolli, pasi gruaja i kishte njohur e kishte filluar të bërtiste.
Mësohet se ai është shprehur para hetuesve se e ka frikë burgun.
“Neve donim vetëm të merrnim paratë. Ajo më njohu dhe filloi të bërtiste, duke na trembur se mund ta na gjente Policia brenda. Nuk e kishim menduar ta vrisnim. Na doli jashtë kontrollit situata. Ju lutem, më falni se e kam frikë burgun”, mësohet të ketë thënë për hetimin 16-vjeçari L. Saliaj.
Krimin e kanë pranuar edhe dy shokët e tij.
Ata kanë thënë se nipi i familjes i ka orientuar duke u thënë se në shtëpi nuk ka njerëz, por kur kanë ndeshur në rezistencën e gruas, kanë bërë edhe lidhjen e saj dhe më pas vrasjen dhe hedhjen në rezervuar.
Sipas informacioneve të grupit hetimor, gjendja e tyre psikologjike është mjaft e rëndë, ndërsa gjatë gjithë kohës 16-vjeçari, i cili është edhe nipi i burrit të viktimës, ka qenë duke qarë.
Pas zbardhjes së krimit të rëndë, në Polici janë shoqëruar edhe familjarët e viktimës dhe autorëve të dyshuar.
Të afërmit e 50-vjeçares janë shprehur se autorët duhet të vuajnë dënimin më të rëndë për veprimin që kanë kryer.
Të arrestuarit janë: L. Saliaj, 16 vjeç, nip i burrit të viktimës, S. Shehaj, 16 vjeç dhe Ervis Zotaj, 26 vjeç, banues në Gjerbës, Mallakastër.
