Një ngjarje e rëndë ka ndodhur mbrëmjen e djeshme në fshatin Kryekuq të Divjakës, ku një 32-vjeçar humbi jetën pas një konflikti për vijën e ujit. Viktima është Besmir Kumria, i cili u godit me thikë për vdekje nga shtetasi Xhesion Toromeni.
Sipas hetimeve paraprake, konflikti mes dy familjeve kishte nisur për shkak të kanalit vaditës në fshat. Edhe pse familjet kishin miqësi me njëra-tjetrën, përplasjet për përdorimin e ujit janë përshkallëzuar në dhunë fatale.
Kumria, i njohur si djalë i qetë dhe punëtor, së bashku me vëllain e tij punonin në zonën e jugut të vendit dhe aktualisht ndodheshin me pushime. Ndërkohë, edhe autori jetonte jashtë shtetit dhe ishte kthyer në Shqipëri ditët e fundit.
Pas krimit, Toromeni u arratis nga vendngjarja, por policia arriti ta arrestojë më vonë. Banesa e tij është marrë nën mbrojtje nga policia, ndërsa shërbimet vijojnë të qëndrojnë në lagjen ku ai banonte, për të shmangur ndonjë përplasje mes familjeve.
Materialet e çështjes i janë referuar Prokurorisë së Lushnjës për veprime të mëtejshme hetimore dhe ligjore.
